ALÞJÓÐLEG SAMKEPPNISHÆFNI ÍSLANDS

Ferðaþjónusta er í eðli sínu harður alþjóðlegur samkeppnisvettvangur þar sem áfangastaðurinn Ísland á í baráttu við fjölda annarra landa og áfangastaða í heiminum um hylli og verðmæti ferðamannsins. Verðmætasköpun ferðaþjónustu fyrir samfélagið ræðst að stórum hluta af því hversu vel við stöndum okkur í þeirri samkeppni. 

Því skiptir höfuðmáli fyrir arð samfélagsins af atvinnugreininni hversu samkeppnishæf atvinnugreinin og áfangastaðurinn er við umheiminn á hinum alþjóðlega vettvangi.

Annað hvert ár gefur World Economic Forum út mælingu á samkeppnishæfni og þróun ferðaþjónustu í ríkjum heims – Travel and Tourism Development Index. Ísland er sem stendur í 23. sæti listans en von er á nýrri útgáfu hans í september 2023.

Það er augljóst og mikilvægt markmið íslenskrar ferðaþjónustu að færast ofar á þennan lista og verða í hópi 15 samkeppnishæfustu ferðaþjónustulanda heims árið 2025.